कबिता

ताराहरुको संसार

-निराजन बतास

यिनीहरुको सुमधुर मिलन र सम्बन्ध नै

रात्री आकाशको गर्व बन्दछ ।

उनीहरु उतै हिडिरहन्छन्

मिर्मिरेको खोजीमा ।

तर न हिँड्न सक्छ आकाश

तारा भएर

न उदाउन न अस्ताउन नै सक्छ

चालहरुमा ।

जीवन एउटा आकाश रहेन

र रह्यो अरबौं ताराहरुको ।

अँध्यारोको जीवन

ताराहरुको अधिकार हो

अँधेरोको टिलपिल अस्तित्व

स्वतन्त्रता हो ताराहरुको ।

अर्को सन्ध्याको प्राप्तिमा

हरेक बिहान बलिदानी दिन्छ ताराले

संघर्ष ताराको जीवन बन्छ-

र त ताराहरुको संसार

बिलाउन सकेन चन्द्रमाको वरिपरि

अस्तित्व नमेटिने भविष्य लेखियो

सूर्यको अगाडि ।

आफूलाई अरुबाट गुमाउन नचाहने

एउटा साक्षी-

बाँच्नुको कखरा ।

उज्यालोको लागि अस्ताउनेहरु

अस्ताउनका लागि उदाउनेहरु

यो धर्तीमा-

कोही मिर्मिरेमा चढिरहेछन्

कोही गोधुलीनेर हाम फालिरहेछन्

र कोही समयको काँध चढेर

पाउजुको चैन मागिरहेछन् ।

र बजिरहेछ लाउडस्पीकरमा

अधिकारको गीत

टुँडिखेलमा… ।

कुरा सिँधै माथि आकाशको हो

कुरा सिँधै मुनि धर्तीको हो ।

-त्रिभुवन बिश्वबिद्यालय , कीर्तिपुर