कबिता

आजको देश

-अबिरल अधिकारी 'ब्याकुलमाइला'

हरियाली र शितलताले छाएको देश

आज उजाड र मरुभूमि बन्दै गएको छ

स्वच्छ सफा र स्वर्गिय आनन्द पाउने देश

आज दुषित बन्दै गएको छ ।

सिता भृकुटी र बुद्ध जस्ता बिभुतिले जन्म लिएको देश

आज घुस्याहाहरुको क्रिडास्थल भएको छ

भाषण ठोकेर जनप्रतिनिधि हुनेहरुबाट नै

आज देश खाडलतिर धकेलिएको छ ।

देशको लागि गोली खेली सहिद हुनेहरुको नाम

ईतिहासको कुनामा थन्किएको छ

गरीबको पसिना चुस्दै उड्ने र गुड्नेहरुको नाम

आज मानबताको प्रतिकको रुपमा चम्किएको छ ।

देश बिकासको लक्ष्य जति सबै

नेताहरुको खल्तीमा अड्किएको छ

देशको योजनाको बजेटले

पाँचतारे होटेलमा नास्ता गर्ने सोख बढेको छ ।

बेरोजगारी हटाउने लक्ष्यहरु

नाता कुटुम्बमा सिमित भएको छ

शिक्षाको उज्यालो घामबाट बन्चित नबनाउनेको लक्ष्य

आज मोटरकार चल्ने ठाउमा मात्र रहेको छ ।

नेपाली धर्म संस्कृति र परम्पराहरु

बिदेशी संस्कृतिको प्रभाबले मर्दै गएको छ

नेपाली युवा युबतीको जोश र जागरहरु

बिदेश जने धुनतिर बढ्दै गएको छ ।