कबिता

नयाँ वर्ष

-केदार श्रेष्ठ 'गगन '

पात्रो फेरेर

वूढो पार्दै मान्छेलाई

यो पल्ट पनि

आगमन भयो

नयाँ वर्षको

र असिमित भन्ज्याङ्ग र घुम्तीहरु पार गर्न

एक खुडि्कलो उक्लियो जीवन

वेहुली अन्मिएको घर मन

प्रत्येक आफ्नो बुढ्याईसँगै

सृजना गरिरहेछ नयाँ–नयाँ संस्मरणात्मक कृतिहरु

र अभाव अनुभूति गरिरहेछन् आँखाहरु

प्रत्येक वसन्तसँगै उपस्थित हुने नयाँ वर्षलाई

देखेजस्तै मान्छेले

खै! कहिले देख्लान्

पूरा भएको यी आँखाहरुले

उसले बनाउदै गरेको अमूर्त चित्र

पशुपति र रत्नपार्कको छेउछाउमा

हात पसारेर बस्ने

मान्छेहरुको पेटभरि अन्न,

आँखाभरि सपना पाल्दै

भारी बोकेर जीवनभरि

पिठ्यू रित्तै देखाएर हिड्ने

भरिया दाइको आङ्गभरि लुगा

र परदेशिएका मायालुहरुको खोजीमा गाइने

असिमित गीतहरुको अन्तिम अन्तरा ।

-भीमस्थान- ५, सिन्धुली

हाल: युएई