गजल

-रुद्र मिश्र

झुपडीमा आगो बल्ने चुलो हुनुपर्छ अब

गैरीखेतमा पानी लाउने कुलो हुनुपर्छ अब

मुठिभरको बीजबाट बस्ती भित्र उम्रीएका

कोपिला नि फुल्नलाई ठुलो हुनुपर्छ अब

बस्ती अनि झुपडीका छाना छाउनुपर्छ

दरवार र महलहरु धुलो हुनुपर्छ अब

पाखुरीको प्रहारले चट्टान पनि फोर्नुपर्छ

परजिबी हातहरु लुलो हुनुपर्छ अब

जनताले चयन सँग बाँच्न पाउनुपर्छ

निर्दयीको आँखा भित्र फुलो हुनुपर्छ अब

-नागिन-१, पाचथर