गजल

-राजेन्द्र थापा

आँसु पुछेपछि रुमालमा, आँसु अड्केको हो जिन्दगी,

चैते खरबारीमा ठूटोले, आगो भड्केको हो जिन्दगी ।

के गर्ने, कसरी गर्ने, नजान्दा'नि गरिए जस्तो,

पैलो मायाको कलेजो झैँ, बेताल धड्केको हो जिन्दगी ।

दोधारे तरबार हो माया, उल्टिने प्रहार हो माया,

बुझ्दै नबुझी आफैँतिर, गोली छड्केको हो जिन्दगी ।

मायाले दिएन मलाई मर्नै, न त दियो जिउन नै,

सुकेको खोलीको थोरै पानीमा, माछी तड्पेको हो जिन्दगी ।

सके सम्म सहेपछि मात्रै, सहनै नसकेपछि मात्रै,

आत्मघाती मानव बम झैँ, आफैँ पड्केको हो जिन्दगी ।

-लोकन्थली