चोखो माया
-नवराज सुब्बा
चोखो माया गाँस्नलाई कुनै दिन आउँला
इन्द्रेणीको बाटो गरि कुनै बेला आउँला ।
अजम्बरी फूल अझै फक्रेकै छ हातमा
तिमीलाई दिन भनि ल्याएको छु साथमा
वसन्तको रङ्ग बोकी कुनै बेला आउँला
इन्द्रेणीको बाटो गरि कुनै बेला आउँला ।
इसाराले बोलाएको आँखा झिम्क्याएको
मैले ठानें मलाइ नै भेट्न बोलाएको
यौवनलाई जिस्क्याउन कुनै बेला आउँला
इन्द्रेणीको बाटो गरि कुनै बेला आउँला ।
छाती अझै दुखिरा'छ कुल्च्या बेला जस्तै
प्यासी मरुभूमि आज छाती भयो उस्तै
नदीसित बग्दै बग्दै कुनै दिन आउँला
इन्द्रेणीको बाटो गरि कुनै बेला आउँला ।
-बिराटनगर
No comments:
Post a Comment