कबिता

आमा कहाँ बिलायौ ?

-आचार्य प्रभा

आमा तिम्रो मातृत्वको परिभाषा

कसरी म दिउँ ?

जब कि तिमीले त मलाई

न्यानोपनको आभाष नदिई

छाडेर गयौ,

बात्सल्यताको महत्व नबुझाई

बिलिन भयौ,

म भने आमा... आमा चिच्याई रहें

तिमी त कठोर बनी

शुन्यमा बिलायौ ।

जब मलाई तिम्रो न्यानोपनको

आवश्यकता थियो तब तिमी त

आँफै चिसिएर बगर बन्यौ

जब मलाई तिम्रो उपदेशको चासो थियो

तब तिमी त वाक्यहिन भै क्षितिजमा निदायौ

भन... आमा तिमी कस्तो सजाय दिई

टाढा-टाढा अस्तित्वहिन भै

कुन नभमा बिलायौ ?

मलाई जन्म दिई सहाराहिन किन बनायौ ?

आमा कुन क्षितिजमा हरायौ ?

मेरो बात्सल्यताको अर्थ किन लुटायौ ?

-अमेरिका