कबिता

फूल, लहरा र नारी

-लक्ष्मी राई

उनीहरू मलाई-

फूल भन्छन्

लहरा भन्छन्

यो फूल, आँगनको दायराभित्र

यो लहरा, पर्खालको भरथेगमा मात्रै

फुल्नुपर्छ , झाङ्गिनुपर्छ रे !

कुन कालखण्डबाट सुरु भए होलान्

यो फूल अनि लहराप्रति

अभिमत उनीहरूको ?

औसत मान्छेहरूको हुलबाट

एक्लिएर सोचिरहेकी छु………

आजपर्यन्त,

उनीहरूले मलाई
बुझ्न सकिरहेका छैनन् या,
मैले उनीहरूको-
फूलको परिभाषा
लहराको विशेषता
जहाँ उम्रिए पनि

जहाँ फैलिए पनि

निश्चित जमिन र,

दायरा छ रे- यो फूल, यो लहराको

यो घरको आँगन हुँदै अलिकति,

पर पर्खालसम्म ।

खैर !

यो फूल,

यो लहरा इत्यादि जे भने पनि,

शाश्वत एउटा सत्य

यो सजीव प्राणी

जस्तै मौसममा पनि फुल्न सक्छे
जस्तै अनकन्टारसम्म फैलन सक्छे

समयसँगै.....

यो फूल
यो लहरा ।

बरु,

निर्धक्क स्वीकार्न चाहँदैनन् उनीहरु

आफ्नै अधुरो अस्तित्वलाई

व्यक्त गर्न सक्दैनन् आफ्नो कमजोरीलाई
हे फूल ! तिमीबिनाको आँगन

हे लहरा ! तिमीबिनाको पर्खाल

इ, हेर ! कति शून्य ! कति महत्वहीन छ

त्यसैले,
तिम्रो उपस्थितिमा रमाएर
बुझपचाइरहेका छौ हामी

अनादिकालदेखिको तिम्रो अस्तित्वलाई ।

-हङकङ