कबिता

म निरीह देश

-आचार्य प्रभा

आरोप/प्रत्यारोप ,

विश्वाश /अबिश्वास ,

घात/प्रतिघात

न्याय /अन्यायको चक्रब्युहमा

फँसेको म निरीह देश

मेरो स्वाभिमान आज भोलि

हरेक जनताको अभिमान अनि प्रतिशोधको

ज्वाला बनेर जलिरहेछ ।

स्वाभिमानको अग्लो शीर बनेर

उभिएको मेरो सगरमाथा पग्लिएर

हर आँखामा छचल्किएको छ ।

चन्द्र,सूर्य छातीमा टाँसेर

फर्फराउने मेरो प्रतिक

केवल ---लाजको पछ्यौरीमा मात्र परिणत छ ।

बिडम्बना हो या सतिको सराप भनूँ ?

मेरो छात्ती कौरव ,पान्डवको

युद्धरूपी रणभूमि बनेको छ ।

स्वयम्भूको त्री-नेत्रले

तान्डव नृत्य हेर्न मात्र बिबश छ

अधीर बनेर मलाई सदा सर्वदा

आषिश दिने पशुपतिनाथ

यथार्थ मा नै 'पशुहरुको 'पतिमा मात्र अनुवाद छ ।

'हामी एक हौ 'भन्ने बाणी

अनेकतामा बिभाजित छ

'मेरी आमा' 'मेरो देश' भन्ने

भावना र शब्दहरु ईर्ष्या र जलन अनि घ्रिणामा

परिवर्तित् छ ,

त्यसैले म निरीह देश

मेरो ललाटमा केवल ---

'निरीह' कोरिएको छ

मेरो आफ्नो स्वाभिमान ,अस्मिता

बन्धकमा परेको छ ।

-अमेरिका