लघुकथा

प्रक्रिया

-धर्मेन्द्र भट्टराई
हैन, तपाईले मेरो मुखमा के हेरिरहनु भएको, जानुस् प्रक्रिया मिलाएर ल्याउनुहोस् अनि मात्र मैले तपाईंको काम गर्नेछु, प्रक्रिया नमिली म तपाईँको काम गर्दैगर्दिन ।" फाँटवालाले गाउँबाट आएको बूढो रामप्रसादलाई आदेश दिँदै भन्यो ।
बूढो त्यहाँबाट अर्को फाँटमा गयो र भन्नथाल्यो, "हजुर मेरो काम...। त्यहाँ बसेको फाँटवाला कर्मचारीले झर्किंदै -"यहाँ होइन, ऊ त्यहाँ जानोस्" भनेर पहिलेकै फाँटमा देखायो ।
रामप्रसाद कार्यालयमा धाउन थालेको पाँच दिन भइसकेको थियो । ऊभन्दा पछि आएकाहरू काम सकेर गइसकेका थिए । सबै कागतपत्र मिलाएर ल्याउँदा पनि उसको काम किन भएन भनेर उसले बुझ्न सकेन । जहिले पनि प्रक्रिया मिलेन भन्छन् ।
ऊ त्यहाँबाट निस्केर चौरमा गयो । उसले परबाट आइरहेको कार्यालयको पियनलाई रोक्दै भन्यो, "हैन ए भाइ यो प्रक्रिया मिलाउने भनेको के रहेछ - मेरो त प्रक्रिया नमिलेर काम रोकिएको भन्छन्, आफू त गाउँले मान्छे, केही बुझ्न सकिन ।"

"ओहो बाजे त्यति पनि कुरा नबुझेको, फाँटवालाको हातमा दक्षिणा भेटी नचढाउञ्जेल प्रक्रिया मिल्दैन भन्ने तपाईँलाई थाहा रहेनछ । प्रक्रिया मिलेपछि तपाईँको काम एक छिन पनि रोकिन्न ।" त्यसपछि बूढो रामप्रसाद प्रक्रिया मिलाउन पिउनको पछि लाग्यो ।