गजल

-'विवश' बलिभद्र कोइराला

एउटा गर्छ झुटको खेती अर्मल तिर्छ अर्को,
बनाउँछ ज्यामी महल तक्मा भिर्छ अर्को ।

न्याय दिन्छु भन्नेहरूको आसमात्रै कति गर्नु,
यता साँझ झुपडीमा निद्रा चिर्छ अर्को ।

हामी तिर्छौँ सैलुङ्गेमा पसिनाका मोती दाना,
तिमी थाप्छौ दिउँसै डलर भन्सार छिर्छ अर्को ।

कस्को शोकमा हाँसौँ हामी कस्को शोकमा रोऔँ,
यहाँ पीडा नथामिदै त्यहाँ गिर्छ अर्को ।

हामी रोपार, बाउसे र साउनका हलीलाई
खान नपाई मङ्‍‌सिरमा पीर नै पीर छ अर्को ।